گذشتہ سے پیوستہ

اردو بلاگرز کانفرنس کے دوسرے روز (27 جنوری 2013ء) کاروائی نو بجے شروع ہونی تھی۔ آج اکثریت نے وقت کی بڑی ”پابندی“ کی اور ”تاخیر“ سے پہنچی۔ انٹرنیٹ کا حال پہلے ہی سنا چکا ہوں۔ دوسرے دن بھی ویسا تھا۔ خرم ابن شبیر کے پاس ایوو ڈیوائس تھی۔ اس سے کام چلانے کی کوشش کی مگر ناکام۔ مجبوری میں آن لائن مقررین کی صرف آواز پر ہی گزارہ کرنا پڑا۔

کلامِ پاک کی تلاوت کے بعد پاکستانی نژاد کینیڈین صحافی ناہید مصطفیٰ کی بات چیت سے دوسرے روز کا آغاز ہوا۔ انہوں نے پاکستانی اور بین الاقوامی بلاگنگ پر بات چیت کے علاوہ پاکستانی بلاگر کے لئے کچھ مشورے دیئے۔ ناہید مصطفیٰ نے کہا کہ اردو بلاگرز کا مقابلہ ٹی وی چینلز سے ہے اس لئے اردو بلاگرز کو تحقیق کے بعد ذمہ داری سے سچ لکھنا ہو گا۔ اردو بلاگرز کی پہنچ عوام کی اکثریت تک ہے اور ان کا دائرہ وسیع ہے جبکہ اردو کے مقابلے میں انگریزی بلاگرز کا نکتہ نظر بہت کم پاکستانیوں کا نکتہ نظر ہے۔ سوال و جواب میں کافی اہم نکات اٹھائے گئے جیسے صحافیوں کے حقوق کے لئے تنظیمیں موجود ہیں مگر بلاگرز کے لئے ایسا کچھ نہیں۔ شعیب صفدر بھائی نے سوال کیا کہ کئی دفعہ ہم لوگ کسی خاص گروہ کا حصہ ہوتے ہیں، اب اس گروہ میں ہی کچھ خامیاں ہیں تو ہم وہ لکھ نہیں سکتے تو ایسی صورت میں کیا کیا جائے؟ اس کے جواب میں ناہید مصطفیٰ صاحبہ نے کہا کہ صحافی ادارے کا پابند ہے اور چھپ کر نہیں لکھ سکتا مگر بلاگر آزاد ہے، وہ گمنام ہو کر لکھے اور ایسے مسائل سامنے لائے۔ مزید ایک صاحب نے سوال کیا کہ اگر اپنے ملک کی کسی خرابی کا ذکر کیا جائے تو لوگ کہتے ہیں کہ یہ محب وطن نہیں یا ملک کا دشمن ہے تو ایسی صورت میں کیا کیا جائے؟ ناہید مصطفیٰ کا جواب تھا کہ اگر تو آپ خرابی کا ذکر اس لئے کر رہے ہیں کہ لوگوں کو اس کا پتہ چلے اور بہتری ہو تو اس میں کوئی حرج نہیں۔ البتہ اگر صرف تنقید برائے تنقید ہے تو یہ ٹھیک نہیں۔ کوشش کریں کہ تصویر کے دونوں رخ سامنے لائیں۔

کام کاج کی مصروفیت کی وجہ سے مجھے ساری باتیں تفصیل سے یاد نہیں جتنا یاد آ رہا ہے وہ لکھ رہا ہوں۔ ویسے جنہوں نے سوال کیے تھے انہیں چاہیئے کہ اپنے سوالات اور ان کے جوابات کی تفصیل اپنے اپنے بلاگ پر تحریر کریں جیسا کہ فخر نوید صاحب نے کیا ہے۔ ناہید مصطفیٰ صاحبہ کا سیشن تقریباً دو گھنٹے چلا۔ اس کے بعد پانچ دس منٹ کا وقفہ ہو گیا۔ پھر کینیڈا سے تعلق رکھنے والی سوشل میڈیا کی ماہر اور صحافی کیٹی مرسر کو آن لائن لیا گیا۔ کیٹی مرسر کے آن لائن آنے سے پہلے ہی میں ایک کام کی وجہ سے کانفرنس ہال سے جا چکا تھا۔ جب واپس آیا تو یہ سیشن سوال و جواب کے مرحلے میں تھا اور اپنے اختتام کو پہنچنے والا تھا۔ ایک سوال کے جواب میں کیٹی مرسر نے کہا کہ باہر کی دنیا میں کچھ بلاگرز ایسے ہوتے ہیں جن کا بلاگ اگر کسی ادارے کو پسند آ جائے تو وہ ادارہ اپنے بلاگ پر بلاگر کو جگہ دے دیتا ہے جبکہ اس بلاگر کو تحریر کے پیسے نہیں دیئے جاتے۔ اس کے علاوہ کچھ ایسے بلاگرز ہوتے ہیں جن کو ادارے یہ آفر دیتے ہیں کہ آپ اپنا بلاگ ہماری ویب سائیٹ پر لے کر آئیں۔ ہماری ویب سائیٹ پر جہاں آپ کا بلاگ ہو گا اس پر جو اشتہارات چلیں گے اس میں سے آپ کو حصہ دیا جائے گا۔ اس کے بعد کچھ ایسے بلاگر ہوتے ہیں جنہیں ادارے باقاعدہ عنوان دے کر کہتے ہیں کہ اس پر لکھ دو۔ اس طرح لکھنے کے پیسے دیئے جاتے ہیں۔ کیٹی مرسر نے کہا کہ کوئی دوسرا چل کر آپ کے پاس نہیں آئے گا بلکہ پہلے بلاگرز کو ہی اداروں کے پاس جانا ہو گا اور انہیں بتانا ہو گا کہ یہ میرا بلاگ ہے، اس پر اتنی ٹریفک ہے اور میرے اتنے قارئین ہیں۔ تب کہیں جا کر بلاگر بڑے اداروں سے منسلک ہو سکے گا۔ کیٹی مرسر سے سوال و جواب کے بعد چائے کا وقفہ ہو گیا۔

چائے کے وقفے کے دوران مختلف باتیں ہوتی رہیں۔ اسی دوران مصطفیٰ ملک صاحب نے کسی ہیڈ ماسٹر کا لطیفہ بھی سنایا تھا۔ مصطفیٰ صاحب سے گذارش ہے کہ وہ لطیفہ یہاں لکھ دیں کیونکہ مجھے یاد نہیں رہا۔ مزید اردو بلاگنگ پر گپ شپ ہوتی رہی۔ اسی دوران محمد حسن معراج صاحب نے کہا کہ ہمارے ہاں سوشل میڈیا کا بڑا عجب رویہ ہے۔ بس کسی نے ایک بات کہہ دی تو اکثریت سوچے سمجھے بغیر اس کے پیچھے دوڑ پڑتی ہے، یہاں پر انہوں نے پانی سے چلنے والی گاڑی کا ذکر کیا۔ اس پر میں نے انہیں جواب دیا کہ ڈاکٹر عطاء الرحمن صاحب کے بعد سب سے پہلے اس جھوٹ کے خلاف اردو بلاگرز ہی بولے تھے۔ اردو بلاگرز کے بعد پھر دوسروں کی تحاریر سامنے آئیں۔ میری بات کے جواب میں محمد حسن معراج نے ”رضیہ پھنسی غنڈوں میں“ والے محاورے کے ذریعے اپنی بات کی وضاحت کرتے ہوئے کہا کہ کہ واقعی اردو بلاگرز کا تجزیہ بہت زبردست ہوتا ہے، اردو بلاگرز دو ٹوک اور کھری کھری بات کرتے ہیں مگر بدقسمتی سے ہمارا اردو بلاگر اس رضیہ کی طرح ہے جو غنڈوں میں پھنس گئی ہے یعنی ایک اردو بلاگر کام کی بات لکھتا ہے تو جواب میں ستر ”کانسپیریسی تھیوریز“ والے آ جاتے ہیں جو حقائق کو توڑ مروڑ کر رکھ دیتے ہیں۔ انہوں نے مزید کہا کہ اب آپ کا سوال یہ ہو گا کہ ہم اس کھرے اور دو ٹوک تجزیہ کرنے والے بلاگر کو ڈھونڈے گے کیسے تو اس کا جواب یہ ہے کہ جو بلاگر آج یہاں آیا ہے وہ ”رضیہ“ ہے اور جو نہیں آئے وہ ”غنڈے“ ہیں۔

گو کہ محمد حسن معراج صاحب نے یہ بات مزاق کے موڈ میں کہی تھی مگر پھر بھی میں نے انہیں جانے سے پہلے پکڑ لیا اور کہا کہ بھائی صاحب ہمارے کئی دوست جو کھری اور دو ٹوک باتیں کرتے ہیں مگر وہ ادھر نہیں آ سکے اور آپ نے انہیں غنڈے کہہ دیا۔ اس کے جواب میں محمد حسن معراج نے کہا پہلی بات تو یہ کہ جس طرح چائے کے وقفے میں آپ لوگ کھل ڈھل کر گپ شپ کر رہے تھے اور لطیفے وغیرہ سنا رہے تھے ایسے ہی میں آپ سے گھل مل کر بات کر رہا تھا۔ دوسرا لگتا ہے میں اپنی بات کی ٹھیک طرح وضاحت نہیں کر سکا۔ آج ادھر آنے والوں سے میری مراد یہ تھی کہ سچ بات کرنے اور حقائق کی تلاش کرنے والے لوگ ادھر یا کہیں بھی، کسی بھی پلیٹ فارم پر پہنچ کر، سچ بات کرتے اور حقائق کی تلاش کرتے ہیں جبکہ ”غنڈے“ نہ تو حقائق کا سامنے کرتے ہیں اور نہ ہی حقائق کی تلاش کرتے ہیں، وہ کسی چیز کو دیکھے بغیر، کسی جگہ جائے بغیر، کسی معلومات کو جانے بغیر بس اس پر ”کانسپیریسی تھیوریز“ پیش کر دیتے ہیں۔ اردو بلاگرز بیچارے ایسے سنی سنائی اور جھوٹ پر مبنی باتیں کرنے والوں کے درمیان پھنس چکے ہیں۔ جس کی وجہ سے اکثر اوقات اردو بلاگرز کچھ نیا کرنے کی بجائے انہیں کانسپیریسی تھیوریز والوں کو جواب دینے میں اپنی توانائی ضائع کر دیتے ہیں۔ ادھر آنا اور نہ آنا تو مثال کے طور پر کہا ہے۔ ادھر آنے سے مراد یہ ہے کہ کسی جگہ حقائق یا بہتری کے لئے پہنچنا، ادھر نہ آنے سے مراد یہ ہے کہ بغیر کسی مجبوری کے کسی جگہ حقائق یا بہتری کے لئے نہ پہنچنا اور الٹا جس چیز کا علم ہی نہیں اس پر اپنا تجزیہ کرنا۔ سچ لکھنے والے اردو بلاگر جو کسی مجبوری کی بنا پر آج یہاں نہیں آ سکے وہ ”غنڈے“ نہیں جبکہ بغیر کسی مجبوری کے سچ کی تلاش کرنے آج جو ادھر نہیں آئے اور پھر کچھ جانے بغیر اپنے تجزیے پیش کریں گے، ایسے لوگ ”غنڈے“ ہیں اور اردو بلاگر ایسے غنڈوں میں پھنس چکے ہیں۔ محمد حسن معراج نے کہا کہ جیسے ابھی کانفرنس میں ایسے لوگ بھی ہوں گے جو کانفرنس کے حق میں نہیں مگر پھر بھی یہ ”رضیہ“ ہیں کیونکہ کم از کم یہ ادھر آئے ہیں حقائق کو اپنی نظر سے دیکھیں گے اور پھر اپنا تجزیہ پیش کریں گے۔ آپ دیکھ لینا اسی کانفرنس کے بعد کئی ایسے لوگ بھی ہوں گے جنہیں کانفرنس کی کاروائی کا ذرا بھی پتہ نہیں ہو گا مگر تجزیہ ایسے کریں گے جیسے وہ یہاں موجود تھے۔ آگے بڑھ کر حقائق کی کھوج لگانے والا اردو بلاگر ”رضیہ“ ہے اور جو سازشیں کرنے والے ”غنڈوں“ میں پھنس چکی ہے۔ گو کہ میں نے یہ محاورہ مذاق کے موڈ میں مثال کے طور پر بولا تھا مگر پھر بھی میری اس بات سے کسی کی دل آزاری ہوئی ہے تو میں معذرت چاہتا ہوں۔ یہ کہتے ہوئے انہوں نے اجازت چاہی اور وہ چلے گئے۔

یہ رضیہ اور غنڈوں والی باتیں چائے کے وقفے میں گپ شپ کے طور پر مزاح کے موڈ میں ہو رہی تھیں۔ اسی وقفے کے دوران مشہور شاعر فرحت عباس شاہ روایتی میڈیا کے خلاف اور بلاگرز کے حق میں کھل کر بولے۔ انہوں نے کہا کہ روائیتی میڈیا کی اکثریت کسی کام کی نہیں، میڈیا میں جو کام کے لوگ ہیں ان پر بھی ادارے اور ایڈیٹرز کی پالیسی ہے۔ آپ بلاگر لوگ آزاد ہو۔ اس ملک کے لئے جو آپ کر سکتے ہیں وہ ہمارا روائیتی میڈیا نہیں کر سکتا۔ آپ نوجوان ہو، اس ملک کی تقدیر آپ کے ہاتھ میں ہے۔ سنی سنائی اور کانسپیریسی تھیوریز بنانے سے دور رہ کر ذمہ داری کے ساتھ سچ کی کھوج لگا کر اسے سب کے سامنے رکھو اور ملک کی تقدیر بدل ڈالو۔ فیس بک، بلاگ اور دیگر سوشل میڈیا پر گالیاں لکھنے کی بجائے کچھ تعمیری کرو اور روائیتی میڈیا کا متبادل بن جاؤ۔ پھر وہ دن آئے گا جب روائیتی میڈیا آپ لوگوں کے قدموں میں ہو گا۔

نوٹ:- جو باتیں مجھے یاد رہیں یہ ان کا مفہوم لکھا ہے۔

اگلا اور آخری حصہ:- کانفرنس کا دوسرا دن اختتام تک