بسم اللہ الرحمن الرحیم
جس چیز کا ڈر تھا، آخر وہی ہوا۔ میں نے اس بارے میں احتجاج کرتے ہوئے پہلے بھی ایک تحریر لکھی تھی جس میں خبروں کے مطابق پچھلے دنوں گجرات میں تقریباً پندرہ ہزار (15000) ”جعلی اسلحہ لائسنس“ پکڑے جانے کی بات کی تھی۔ اب بات نکلی ہے کہ یہ پندرہ ہزار نہیں بلکہ تیرہ ہزار لائسنس تھے۔ خیر یہ دو ہزار کا فرق ہمارے میڈیا کی ”بہتر سروس“ بھی ہو سکتی ہے کیونکہ اکثر یہ گنتی کی غلطی کر جاتے ہیں یا پھر ہو سکتا ہے کہ دوہزار سے کوئی مک مکا ہو گیا ہو۔ چلو ہم فی الحال یہی مان لیتے ہیں کہ 13000 ہی تھے۔ خیر جب یہ سکینڈل سامنے آیا تھا تو جیسے ساری حکومتیں کرتی ہیں ویسے ہی ہماری حکومت پنجاب نے بھی کیا یعنی انکوائری بیٹھا دی۔
کچھ دن پہلے انکوائری یعنی وزیرِ قانون پنجاب رانا ثناءاللہ کی زیر صدارت اجلاس میں ان 13000اسلحہ لائسنس کو ناجائز قرار دیتے ہوئے منسوخ کر دیا۔ منسوخ شدہ اسلحہ لائسنس اور ان پر جاری ہونے والے اسلحہ کو پندرہ یوم میں رضاکارانہ طور پر جمع کروانے کا حکم جاری کیا۔
وہی ہوا جس کا ڈر تھا۔ فراڈ سرکاری ملازمین نے کیا اور سزا عوام کو مل رہی ہے۔ اب عام شہری کہاں جائے؟ جس نے اسلحہ لائسنس کی تقریبا سات سے آٹھ ہزار روپے فیس اسلحہ برانچ کو ادا کی تھی، پھر ڈاکخانہ میں انداراج کروایا تھا اور پھر اس لئے اسلحہ خریدا کہ اس کے پاس لائسنس موجود ہے۔ یہ بات آج کی نہیں بلکہ کئی لوگ تو دو دفعہ اسلحہ لائسنس کی ڈاکخانہ سے تجدید بھی کروا چکے ہیں۔
تیرہ ہزار لائسنس کوئی ایک دن میں نہیں بنے بلکہ یہ معاملہ دو سال پہلے کا ہے اور پتہ نہیں کتنے لمبے عرصہ سے یہ کھیل کھیلا جا رہا تھا۔ اب جو لائسنس منسوخ کر رہے ہیں وہ اس وقت کہاں تھے جب یہ کھیل چل رہا تھا؟ کوئی ان سے پوچھے جناب آپ کو حکومت میں آئے اتنا عرصہ ہو گیا ہے اور اتنا بڑا سکینڈل اب جا کر آپ کو پتہ چل رہا ہے۔ یہ کس کی نالائقی ہے؟ کیا یہ بھی ان تیرہ ہزار کی نالائقی ہے جو آپ کے بنائے ہوئے ادارہ میں گئے اور آپ کے کلرک صاحب نے کہا اتنی فیس اور فلاں فلاں کاغذات جمع کرواؤ، اور فلاں دن آ کر اپنا لائسنس لے جانا۔ یا پھر کہیں ایسے تو نہیں تھا کہ اسلحہ برانچ، اس کے اعلیٰ عہدیدار اور اسلحہ ڈیلر سب مل بانٹ کر کھا رہے تھے۔حکومت اتنی دیر تماشہ دیکھتی رہی اور اب لائسنس منسوخ کر کے تیرہ ہزار شہریوں کو تماشہ بنا رہی ہے۔ ایک طرف لائسنس کی فیس کھائی دوسری طرف اسلحہ ڈیلروں کا اسلحہ فروخت کروایا اور اب لائسنس منسوخ، فیس ہضم اور اسلحہ مال خانے۔ مال خانے بھی تو کچرا ہی پہنچنا ہے اور اچھا اسلحہ حکومت کے افسران نے ہی پی جانا ہے۔ ساری بات بڑی عجیب ہے یعنی سب کچھ ہو گیا، سانپ مر گیا، لاٹھی بھی نہ ٹوٹی اور نظام پھر ”شفاف کا شفاف“ اور ماری گئی غریب عوام۔ ہمیں آزاد ہوئے 63سال ہو گئے ہیں لیکن ہماری جمہوریت آج بھی شہنشاہوں جیسے فیصلے کر رہی ہے۔
سارا معاملہ بالکل صاف ہے۔ اسلحہ اور اسلحہ لائسنس کا ریکارڈ بھی موجود ہے، ڈاکخانہ میں اندراج اورتمام اسلحہ لائسنسوں کی ڈاکخانہ سے ایک یا دو بار تجدید فیس کے ساتھ ہو چکی ہے۔ بس اسلحہ لائسنس بنواتے ہوئے جو فیس تھی وہ اسلحہ برانچ کا عملہ خود کھا گیا تھا اور اسی بات کو لے کر حکومت نے شریف شہریوں کے لائسنس منسوخ کر دیئے ہیں اور ان کا اسلحہ ضبط کر رہی ہے۔
ایک لمحہ کے لئے مان لیتے ہیں کہ اسلحہ لائسنس منسوخ کرنے والا قدم بالکل ٹھیک ہے تو کوئی ان تیرہ ہزار کو بھی تو بتائے کہ ان کا پیسا جو سرکار کے ملازمین کھا گئے ہیں وہ کون واپس دلوائے گا؟ ڈاکخانہ سے لائسنس کی تجدید کے لئے جو فیس حکومت کو ادا کی گئی تھی، کیا حکومت وہ فیس واپس کرے گی؟ اسلحہ مال خانے جانے سے جو اسلحہ کی قیمت ہے وہ کون دے گا؟ کیا حکومت ان تیرہ ہزار کو اتنا وقت اور ساتھ دے سکتی ہے کہ وہ اسلحہ واپس اسلحہ ڈیلروں کو فروخت کر دیں؟ لیکن ایسا کچھ نہیں ہو گا کیونکہ اگر اسلحہ واپس اسلحہ ڈیلروں کو فروخت کرنے کا کہا گیا تو اسلحہ ڈیلر بہت شور مچائیں گے اور شاید حکومت یہ بھی برداشت نہیں کر سکتی۔ بس عوام کو ہی دبا سکتی ہے۔ اگر حکومت کہے کہ اس کا کوئی قصور نہیں بلکہ عوام نے خود ہی غلطی کی ہے تو پھر میرے سیدھے اور سا دے سے سوال ہیں کہ اسلحہ برانچ کس کی ہے؟ اسلحہ برانچ کا عملہ کس نے بھرتی کیا تھا؟ اتنا بڑا کام ہوتا رہا اور اسلحہ برانچ کے انچارج تک کو پتہ نہ چلا؟ اینٹی کرپشن والے کہاں تھے؟ تقریباً دو سال حکومت کہاں سو رہی تھی؟
”حاکمِ اعلیٰ “کیا اب ایسے حالات کو ٹھیک کرنا بھی عوام آپ کو سیکھائے گی؟
نوٹ:- اس تحریر کو صوبائی تعصب کا رنگ ہرگز نہ دیا جائے۔ یہ مسئلہ جتنا پنجاب کا ہے اتنا ہی پاکستان کا بھی ہے اور پاکستان ہم سب کا ہے۔
پاکستان زندہ باد